നമുക്കവളെ ഭ്രാന്തി എന്ന് വിളിക്കാം ...
അവളോ
ഓര്‍മ്മകളുടെ ആഴങ്ങളില്‍ ഊളിയിട്ടു
കക്ക വാരി ....കണ്ണീരൊഴിച്ചു
മനസ്സിലിട്ടു നീറ്റി
അഴുക്കു പിടിച്ച ചുവരുകള്‍
വെള്ള പൂശി......
നമ്മള്‍ വഴിപോക്കര്‍
അത് ചുണ്ണാബ്ആക്കി
മുറുക്കി ചുവപ്പിച്ച്
ആ ചുവരില്‍ നീട്ടിത്തുപ്പി
ആര്‍ത്തു വിളിച്ചു...ഭ്രാന്തി
ആരവങ്ങള്‍ക്കൊടുവില്‍
ഇരുളിന്‍റെ മറവില്‍
ഭ്രാന്തിനു വിലപേശി
കച്ചവട മുറപ്പിച്ചവര്‍
ആ ചുവരുകളില്‍ കോറി വരച്ചു.
ഒരുപിടി കക്കക്കായി
അവളിപ്പോള്‍
ഉദരത്തില്‍ പുതു ജീവനുമായി
തെരുവിലലയുന്നു
നമുക്കവളെ ഭ്രാന്തി എന്ന് വിളിക്കാം ..
ഗോപി വെട്ടിക്കാട്ട്...
